Mesuro Dylanwad?

Sut mae mesuro dylanwad? Mae’n beth anodd ar y naw – os nad amhosib – i’w wneud. Ond pob hyn a hyn fe ddaw ystadegyn diddorol neu stori bach o gyfeiriad annisgwyl.

Un felly oedd canlyniad ymholiad at Lywodraeth Cymru:

Pob gohebiaeth gan Adran Amgylchedd ac Adran Trafnidiaeth Llywodraeth Cymru, sy’n crybwyll yr enw ‘Gareth Clubb’, o 1 Ebrill 2013 i 12 Medi, 2014.

Nid er mwyn dyrchafu fy hun oedd y cais gwybodaeth yma. Roeddwn i’n trio dod o hyd i wybodaeth, yn dilyn un ebost yn y gyfres hon oedd yn amlwg yn cyfeirio ataf i. Ond ces i ymateb syfrdanol:

yr wyf wedi dod i’r penderfyniad y bydd hi dal yn costio mwy na’r terfyn priodol a sefydlwyd yn y Rheoliadau Rhyddid Gwybodaeth a Diogelu Data (Terfyn a Ffioedd Priodol) 2004 i ystyried eich cais…

Wrth wneud fy mhenderfyniad y byddai delio â’ch cais yn fwy na’r terfyn priodol, ymgymerwyd chwiliad ar ein system ffeilio electronig. Gwnaeth y chwiliad edrych am yr enw Gareth Clubb mewn unrhyw le yn unrhyw ddogfen, ffeil, ffolder neu ‘e-clip’ o fewn y ffrâm amser penodedig. Dychwelwyd 3,102 o ganlyniadau.

Tros 3,100 o eitemau sy’n crybwyll yr enw, o fewn cyfnod tipyn yn llai na 18 mis, o ddwy Adran y Llywodraeth?!

Dwi ddim yn dweud am eiliad mai dyma yw mesur o ddylanwad. Ond mae’n fesur o rywbeth – dwn i ddim be.

Nadolig llawen i chi i gyd.


Cofnodwyd

yn

,

gan

Tagiau:

Sylwadau

Gadael Ymateb

Ni fydd eich cyfeiriad e-bost yn cael ei gyhoeddi. Mae’r meysydd gofynnol yn cael eu marcio *